ମିଳିଥିବା ସୂଚନା ଅନୁସାରେ, ପାଣ୍ଡିଆନଙ୍କ ସଭା, ମଞ୍ଚ, ଆଲୁଅ, ପ୍ରଚାର ପ୍ରସାର, ପ୍ରବଳ ମାତ୍ରାରେ ଲୋକବୁହା ଓ ଲୋକଙ୍କ ପାଇଁ ପ୍ରଚୁର ଖାଦ୍ୟ ପାନୀୟର ବ୍ୟବସ୍ଥା ହୋଇଥିଲା । ଏସବୁର ଖର୍ଚ୍ଚ ବଜେଟରେ ଟଙ୍କାଟିଏ ବ୍ୟୟବରାଦ ନାହିଁ କି ଜିଲ୍ଲା ପ୍ରଶାସନ ଟଙ୍କାଟିଏ ଖର୍ଚ୍ଚ କରିନି । ଯଦି ଏମିତି ହୋଇଛି ତାହାଲେ କୋଟି କୋଟି ଟଙ୍କା ଖର୍ଚ୍ଚ କଲା କିଏ ? କାହିଁକି ଖର୍ଚ୍ଚ କଲା ? କଥା ହେଲା ବିଜେଡି ସରକାରରେ ଥିବା ବେଳେ ରାଜନେତା ନୁହେଁ ବରଂ ପ୍ରଶାସକ ହିଁ ସର୍ବେସର୍ବା ଥିଲେ । ଖାସ୍ କରି ସିଏମଓକୁ ଘେରି ରହିଥିବା କୁଟେରୀ ଗ୍ୟାଙ୍ଗ ପୂରା ଶାସନ ବ୍ୟବସ୍ଥା ବୁଝୁଥିଲେ । ଆଉ ସେମାନଙ୍କର ନେତୃତ୍ଵ ନେଉଥିଲେ ପାଣ୍ଡିଆନ । ଏମିତିକି ମନଇଚ୍ଛା ଶାସନ ଚଳାଇବା ସହ ପୂରା ନେତାଠାଣୀରେ ରାଜ୍ୟର ୩୧୪ ବ୍ଲକରେ ଚକ୍କର ମାରୁଥିଲେ । ଏମିତିକି ନବୀନ ଷଷ୍ଠଥର ଲାଗି ମୁଖ୍ୟମନ୍ତ୍ରୀ ନହେଲେ ସେ ସନ୍ୟାସ ନେଇଯିବେ ବୋଲି କହିବାକୁ ବି ପଛାଉନଥିଲେ । ହେଲେ ବିଜେଡି ହାରିବା ପରେ ବାବୁଙ୍କର ଗୋଟିଏ ପରେ ଗୋଟିଏ କଳାକାହାଣୀ ସାମ୍ନାକୁ ଆସୁଛି । ଯାହା ରାଜ୍ୟ ରାଜନୀତିକୁ ବେଶ ପ୍ରଭାବତି କରୁଛି ।
ସରକାର ବଦଳିଲା, ବିଜେଡି ନେତାଙ୍କ ଟେନସନ ବଢିଲା । କାରଣ ବିଜେପି ପ୍ରତିଶୃତି ଦେଇଛି ଦୁର୍ନୀତିର ନାୟକମାନଙ୍କୁ ପଠାଯିବ ଜେଲ୍ । ପ୍ରଧାନମନ୍ତ୍ରୀ କହିଥିଲେ ସିଏମ୍ ଅଫିସ ଓ ସିଏମ୍ ଆବାସ ମାଫିଆଙ୍କ କବଜାରେ । ମାଫିଆଙ୍କ ଅଣ୍ଟା ଭାଙ୍ଗିଦେବାକୁ ଚେତାବନୀ ଦେଇଥିଲେ ମୋଦି । ସେପଟେ ଶ୍ରୀମନ୍ଦିର ଚତୁଃପାର୍ଶ୍ବରେ କିଏ ଆଲୋକ ଲଗେଇଥିଲା, କାହିଁକି ଖୋଲିଲା ? କାହା ପାଖେ ତାର ଉତ୍ତର ନଥିବା କହି ଖୁଲାସା କରିଛନ୍ତି ରୁବେନ ବାନାର୍ଜୀ । ଏବେ ପ୍ରଶ୍ନ- ଚାଲୁଥିଲା କି ରାଜ୍ୟରେ ସମାନ୍ତରାଳ ସରକାର! ସରକାରଙ୍କ ବ୍ୟବସ୍ଥା ବାହାରେ ସରକାର ଓ ପ୍ରଶାସନକୁ ମାଡ଼ି ବସିଥିଲା ଅସାମ୍ବିଧାନିକ ବ୍ୟବସ୍ଥା । ସରକାର ବଦଳୁ ବଦଳୁ ଓଡ଼ିଆ ଆସ୍ଥାକୁ କରାଯାଇଥିଲା ଅପମାନ । ଓଡ଼ିଆ ଅସ୍ମିତାର ପ୍ରତୀକ ଶ୍ରୀମନ୍ଦିର ଚତୁଃପାର୍ଶ୍ବରୁ ଆଲୁଅ ହୋଇଥିଲା ଉଭାନ୍ । ଅନ୍ଧାର ପରେ ତନାଘନାରୁ ମିଳିଛି ରୋଚକ ତଥ୍ୟ । ଆଲୋକୀକରଣ ବାବଦକୁ ଶ୍ରୀମନ୍ଦିର ପ୍ରଶାସନ ଦେଉନଥିଲା ଟଙ୍କା । ଜିଲ୍ଲା ପ୍ରଶାସନ ମଧ୍ୟ ଖର୍ଚ୍ଚ କରୁନଥିଲା ଟଙ୍କା ।.. ଲାଇଟ ବାବଦକୁ କିଏ ଆଉ କାହିଁକି ଖର୍ଚ୍ଚ କରିଥିଲା ମୋଟା ଟଙ୍କା ? ତାହାକୁ ନେଇ ପ୍ରଶ୍ନ ସମସ୍ତଙ୍କ ମନରେ ଉଙ୍କିମାରୁଥିବା ବେଳେ ରୁବେନଙ୍କ ମନ୍ତବ୍ୟ ଚର୍ଚ୍ଚାକୁ ଆହୁରି ଖୋରାକ ଯୋଗାଇଛି ।
