ବଳଙ୍ଗା ଦୁଷ୍କର୍ମ ମାମଲା: ଅଭିଯୁକ୍ତ ଏଏସଆଇ ଚିତ୍ତରଂଜନ ଦାସ ଗିରଫ

ପୁରୀ: ଗିରଫ ହେଲେ ପୁରୀ ଜିଲ୍ଲା ବଳଙ୍ଗା ଥାନା ଏଏସଆଇ ଚିତ୍ତରଂଜନ ଦାସ । ଗିରଫ ପରେ ତାଙ୍କୁ କୋର୍ଟଚାଲାଣ କରାଯାଇଥିବା ପୁରୀ ଏସ୍‌ପି ଗଣମାଧ୍ୟମକୁ ମେସେଜ କରି ଜଣାଇଛନ୍ତି । ଏହି ଘଟଣାର ତଦନ୍ତ ଭାର ପିପିଲି ଏସଡିପିଓଙ୍କୁ ଦିଆଯାଇଥିବା ବେଳେ ତଦରାଖ କରିବେ ନିଜେ ଏସ୍‌ପି । ଅପରପକ୍ଷେ ବଳଙ୍ଗା ଥାନା ଅଧିକାରୀଙ୍କ ନାମରେ ଦୁଷ୍କର୍ମ ଅଭିଯୋଗ ଆସିବା ପରେ ସଫେଇ ଦେଇଛନ୍ତି ଚିତ୍ତରଂଜନ । ମୋତେ ଫସାଇ ଦେଇଛନ୍ତି । ମୋତେ ବ୍ଲାକ ମେଲିଂ କରାଯାଇଛି । ଏମିତି କଥା କହି ନିଜକୁ ନିର୍ଦୋଷ ବୋଲି ପ୍ରମାଣ କରିବାକୁ ପ୍ରୟାସ କରିଛନ୍ତି ଚିତ୍ତରଂଜନ ।

ଚିତ୍ତରଂଜନ ପୋଲିସ ହେପାଜତରେ ଥିବା ବେଳେ ସଫେଇ ଦେଲେ କିପରି ? ଏହି ସଫେଇ ଦେବାକୁ ପୋଲିସ ତାଙ୍କୁ ସୁଯୋଗ ଦେଇଛି । ପୋଲିସ ଜାଣି ଜାଣି କିପରି ଗଣମାଧ୍ୟମ ଆଗରେ ସଫେଇ ଦେବାକୁ ଚିତ୍ତରଂଜନଙ୍କୁ ସୁଯୋଗ ଦେଉଛି । ଅନ୍ୟ କୌଣସି ଅପରାଧି ହୋଇଥିଲେ, ପୋଲିସ ମୁହଁରେ କପଡ଼ା ଘୋଡାଇ କେବଳ ବାହାଦୁରି ନେବା ପାଇଁ ଗଣମାଧ୍ୟମ ଆଗରେ ଠିଆକରେ । ସେମାନଙ୍କୁ କ୍ୟାମେରା ଆଗରେ ମୁହଁ ଖୋଲିବାକୁ ସୁଯୋଗ ଦିଏନାହିଁ  । ଘଳିଆ ବାଟରେ ଚିତ୍ତରଂଜନକୁ ଖସାଇ ଦେବାକୁ ପୋଲିସ ଉଦ୍ୟମ କରୁନାହିଁତ ? ଅପରପକ୍ଷେ ଏହି ଘଟଣା ଏବେ ରାଜ୍ୟରେ ହଇଚଇ ସୃଷ୍ଟି କରିଥିବା ବେଳେ ପୁରୀ ଏସ୍‌ପି ଦିନ ସାରା ନୀରବ ରହିଥିଲେ । ସଂଧ୍ୟା ପ୍ରାୟ 7ଟା ବେଳେ ନିଜ ମୋବାଇଲରୁ ଗଣମାଧ୍ୟମ ପ୍ରତିନିଧିଙ୍କ ନିକଟକୁ ଚିତ୍ତରଂଜନ ଗିରଫ ହୋଇଥିବା ମେସେଜ୍‌ ପଠାଇଥିଲେ ।