ଶହ ଶହ ବର୍ଷ ଧରି ଓଡ଼ିଶାର ଲୋକମାନେ ପଖାଳ ଖାଉଥିବା ବେଳେ ଏହା ଉପରେ ଆଗରୁ ସେପରି କୌଣସି ବୈଜ୍ଞାନିକ ଗବେଷଣା ହୋଇ ନଥିଲା। ମାତ୍ର ଭୁବନେଶ୍ବର ଏମ୍ସ ଅଧିନରେ ଥିବା ସେଣ୍ଟର ଅଫ୍ ଏକ୍ସଲେନ୍ସ ଫର୍ କ୍ଳିନିକାଲ ମାଇକ୍ରୋବାୟୋମ୍ ରିସର୍ଚ୍ଚ ବା ସିସିଏମଆରର୍ ମୁଖ୍ୟ ତଥା ବାୟୋ କେମେଷ୍ଟ୍ରିର ଆଡ଼ିସନାଲ ପ୍ରଫେସର୍ ବାଲାମୁରୁଗାନ୍ ରାମଦାସଙ୍କ ଟିମ୍ ୨୦୧୯ରୁ ଓଡ଼ିଆଙ୍କ ପ୍ରିୟ ଖାଦ୍ୟ ପଖାଳର ଉପକାରିତା ବାବଦରେ ଗବେଷଣା କରି ଆସୁଛନ୍ତି । ତାଙ୍କ ଗବେଷଣା ଟିମ୍ ଓଡ଼ିଶାର ବିଭିନ୍ନ ଅଂଚଳର ଲୋକମାନେ ଖାଉଥିବା ପଖାଳ ତୋରାଣିର ୨୦ ଟି ନମୁନା ସଂଗ୍ରହ କରି ପରୀକ୍ଷା କରିଥିଲେ। ତୋରାଣିରେ ଏକ ପ୍ରକାର ଲାକ୍ଟୋ ବାସିଲସ୍ ଅଣୁଜୀବ ଥିବାର ଗବେଷଣା ଟିମ୍ ଠାବ କରିଛନ୍ତି। ଏହି ଅଣୁଜୀବ ଜଟିଳ ଶ୍ବେତସାରକୁ ବ୍ୟବହାର କରି ସର୍ଟ ଚେନ୍ ଫ୍ୟାଟି ଏସିଡ୍ ବା ଏକ ପ୍ରକାର ସ୍ନେହସାର ସୃଷ୍ଟି କରନ୍ତି ବୋଲି ଜଣାପଡ଼ିଛି। କେବଳ ସେତିକି ନୁହେଁ ଏହି ସ୍ନେହସାରରେ ଥିବା ଅଣୁଗୁଡ଼ିକର ପ୍ରଦାହ ନିରୋଧି ବା ଆଣ୍ଟି ଇନଫ୍ଲୋମେଟୋରୀ ଗୁଣ ମଧ୍ୟ ରହିଛି। ଏହା ସହିତ ତୋରାଣିରେ ଥିବା ଲାକ୍ଟୋ ବାସିଲସ୍ ଅଣୁଜୀବ ଶରୀରରେ ଇମ୍ୟୁନୋଗ୍ଲୋବୁଲିନ୍ କ୍ଷରଣକୁ ମଧ୍ୟ ବଢ଼ାନ୍ତି ଯାହା ଫୁସଫୁସ୍ , ଅନ୍ତନଳୀ ଏବଂ ବିଭିନ୍ନ ପ୍ରକାର ସଂକ୍ରମଣ ବିରୋଧରେ ଶରୀରକୁ ସୁରକ୍ଷା ଯୋଗାଇଥାଏ। ପଖାଳ ତୋରାଣିର ଭୂତାଣୁ ନିରୋଧି ବା ଆଣ୍ଟି ଭାଇରାଲ ଗୁଣ ଥିବା ସହିତ ଏହା ଶରୀରର ପାଇଁ ଶକ୍ତିର ଉତ୍ସ ବୋଲି ପ୍ରମାଣିତ କରିଛନ୍ତି ଭୁବନେଶ୍ବର ଏମ୍ସର ଗବେଷକ ଟିମ୍ । ତେବେ ଆଉ ଯେଉଁ ବଡ଼ ପ୍ରମାଣଟି ଗବେଷଣା ଟିମ୍କୁ ମିଳିଛି ତାହା ହେଲା ପଖାଳ ଓ ତୋରଣି ଗର୍ଭାବସ୍ଥାରେ ଭୃଣର ବିକାଶରେ ଲାଭଦାୟକ ହୋଇଥାଏ ଏବଂ ମାତୃସ୍ବାସ୍ଥ୍ୟକୁ ସୁରକ୍ଷା ଦେଇ କୁପୋଷଣ ହ୍ରାସ କରିବାରେ ସହାୟକ ହୋଇଥାଏ।
ଏବେ ଓଡ଼ିଆଙ୍କ ପ୍ରିୟ ଖାଦ୍ୟ ପଖାଳକୁ ନେଇ ଏମ୍ସର ଏପରି ଗବେଷଣା ଆଗକୁ ଏହି ଖାଦ୍ୟ ବାବଦରେ ଆହୁରି ଅଧିକ ଗବେଷଣା ପାଇଁ ବାଟ ଫିଟାଇବ ବୋଲି କୁହାଯାଇପାରେ।
