ଆସନ୍ତାକାଲିଠାରୁ ତିନି ରଥକୁ ଖୋଲାଯିବ, ଚଳିତବର୍ଷ ଭଙ୍ଗାଯିବନି ଶ୍ରୀଜୀଉଙ୍କ ରଥ

ପୁରୀ:  ମ୍ୟୁଜିୟମରେ ରହିବ ରଥ । ଚଳିତ ବର୍ଷ ତିନି ରଥ ଭଙ୍ଗାନଯାଇ ସଂରକ୍ଷଣ କରାଯିବ । ଏପରି ନିଷ୍ପତ୍ତି ନେଇଛି ଶ୍ରୀମନ୍ଦିର ପ୍ରଶାସନ । ଆସନ୍ତାକାଲିଠାରୁ ତିନି ରଥକୁ ଖୋଲାଯିବା ପାଇଁ ନିଷ୍ପତ୍ତି ହୋଇଥିବା ବେଳେ ରଥନିର୍ମାଣ ସେବକ , ପରିଚାଳନା କମିଟି ସଦସ୍ୟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଭୋଇସେବକ ମାନେ ପରମ୍ପରା ଅନୁଯାୟୀ ରଥଭଙ୍ଗା କାର‌୍ୟ୍ୟ କରିବେ। କିନ୍ତୁ ରଥକୁ ନଭାଙ୍ଗି ସୁରକ୍ଷିତ ଭାବେ ଖୋଲାଯିବା ସହ ଏହି କାର‌୍ୟ୍ୟ ପ୍ରାୟ ଏକ ମାସ ଧରି ଚାଲିବ। ତିନିରଥକୁ ମହାପ୍ରଭୁଙ୍କ ପ୍ରମୋଦ ଉଦ୍ୟାନ ଜଗନ୍ନାଥ ବଲ୍ଲଭରେ ସଂରକ୍ଷଣ କରି ରଖାଯିବ ବୋଲି , ସୂଚନା ଦେଇଛନ୍ତି ଶ୍ରୀମନ୍ଦିର ଉନ୍ନୟନ ପ୍ରଶାସକ ଅଜୟ ଜେନା। ସେପଟେ ରଥ ଭଙ୍ଗାଯାଇ ନୂତନ କାଠରେ ପୁର୍ନବାର ରଥ ନିର୍ମାଣ କରିବାକୁ ନାପସନ୍ଦ କରିଛନ୍ତି ଜଗନ୍ନାଥ ମହାପ୍ରଭୁଙ୍କ ରଥର ମୁଖ୍ୟ ବିଶ୍ୱକର୍ମା ସେବାୟତ।

ଚଳିତବର୍ଷ ସାରା ବିଶ୍ୱ ଦେଖିଲା ମହାପ୍ରଭୁଙ୍କ ଐତିହାସିକ ଘୋଷଯାତ୍ରା। ବିନା ଭକ୍ତରେ ଏବଂ ନିଜର ପାରମ୍ପରିକ ବସ୍ତ୍ର ସହ ଖାଲି ପାଦରେ ତିନି ରଥ ଟାଣିଥିଲେ ସେବାୟତ। ସେଥିପାଇଁ ଏକ ସ୍ମୃତି ଓ ସ୍ମାରକୀ ହିସାବରେ ଚତୁର୍ଦ୍ଧାବିଗ୍ରହଙ୍କ ରଥ ଭଙ୍ଗାନଯାଇ ତାକୁ ଭକ୍ତଙ୍କ ଉଦେଶ୍ୟରେ ସଂରକ୍ଷିତ କରି ରଖିବାକୁ ଚରମ ନିଷ୍ପତ୍ତି ନେଇଛି ଶ୍ରୀମନ୍ଦିର ପ୍ରଶାସନ। ଆସନ୍ତାକାଲି ଠାରୁ ତିନି ରଥକୁ ଖୋଲାଯିବା ପାଇଁ ନିଷ୍ପତ୍ତି ହୋଇଛି। ରଥନିର୍ମାଣ ସେବକ , ପରିଚାଳନା କମିଟି ସଦସ୍ୟଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ଭୋଇସେବକ ମାନେ ପରମ୍ପରା ଅନୁଯାୟୀ ରଥଭଙ୍ଗା କାର‌୍ୟ୍ୟ କରିବେ।କିନ୍ତୁ ରଥକୁ ସମ୍ପୂର୍ଣ୍ଣ ନଭାଙ୍ଗି ସୁରକ୍ଷିତ ଭାବେ ଖୋଲାଯିବ । ଏହି କାର୍ଯ୍ୟ ଆସନ୍ତା ଏକମାସ ଧରି ଚାଲିବ। ପୂର୍ବରୁ ଶ୍ରୀମନ୍ଦିର ପରିଚାଳନା କମିଟି ଓ ଛତିଶାନିଯୋଗ ବୈଠକରେ ଏ ନେଇ ପ୍ରସ୍ତାବ ଆସିଥଲା। ପ୍ରତ୍ୟକ ବର୍ଷ ରଥଯାତ୍ରା ପରେ ତିନି ରଥ ଭଙ୍ଗାଯାଇ ଏହାର ବିଭିନ୍ନ ଅଂଶ ନିଲାମ କରାଯାଇଥାଏ। କିନ୍ତୁ ଚଳିତବର୍ଷ ଏହାକୁ ଭଙ୍ଗାନଯାଇ ସଂରକ୍ଷଣ କରାଯିବ।

ଗୋଟିଏ ପଟେ ଚଳିତବର୍ଷ ଘୋଷଯାତ୍ରା କୋଭିଡ୍୧୯ କଟକଣା ମୁତାବକ ବିନା ଭକ୍ତରେ କରାଯାଇ ଶ୍ରୀମନ୍ଦିର ଇତିହାସରେ ନୂତନ ଅଧ୍ୟାୟ ସୃଷ୍ଟି କରିଥିବା ବେଳେ ଅନ୍ୟପଟେ ଭକ୍ତ ଓ ଶ୍ରଦ୍ଧାଳୁଙ୍କ ଉଦ୍ଦେଶ୍ୟରେ ଏହାକୁ ସଂରକ୍ଷଣ କରି ରଖାଯିବା ନିଷ୍ପତ୍ତି ଏକ ସ୍ମୃତି ଓ ସ୍ମାରକୀ ହୋଇ ଚିରଦିନ ପାଇଁ ରହିବ।