ରୟାଲ ଚାଲେଞ୍ଜର୍ସ ବେଙ୍ଗାଲୁରୁ ପାଇଁ ଜଣେ ପ୍ରମୁଖ ସଦସ୍ୟ ଭାବରେ ସାମିଲ ହୋଇ ରହିଛନ୍ତି ବିରାଟ କୋହଲି । ୨୦୦୮ ମସିହାରୁ ୨୦୨୪ ପର୍ଯ୍ୟନ୍ତ ବିରାଟ ଏହି ଦଳରେ ରହିଛନ୍ତି । ତେବେ ଏହା ମଧ୍ୟରେ ୨୦୧୩-୨୦୨୧ ବିରାଟ ଦଳର ଅଧିନାୟକ ପଦ ମଧ୍ୟ ସମ୍ଭାଳିଥିଲେ । କିନ୍ତୁ ୨୦୨୧ ମସିହା ପରେ ସେ ଅଧିନାୟକ ପଦରୁ ଓହରିବା ସହିତ ୨୦୨୨ରେ ଫାଫ୍ ଡୁପ୍ଲେସିସଙ୍କୁ ଏହି ଦାୟିତ୍ୱ ହସ୍ତାନ୍ତର କରିଥିଲା ଫ୍ରାଞ୍ଚାଇଜି । ତେବେ ଆସନ୍ତା ସଜିନରୁ ବିରାଟ ପୁଣିଥରେ ଏହି ଦାୟିତ୍ୱ ନେବା ପାଇଁ ପ୍ରସ୍ତୁତ ଥିବା କୁହାଯାଉଛି । ରିପୋର୍ଟ ଅନୁସାରେ, ଆରସିବି ମ୍ୟାନେଜମେଣ୍ଟ ସହ ଏକ ଚର୍ଚ୍ଚା ସମୟରେ ଏ ନେଇ ସଂକେତ ଦେଇଛନ୍ତି କିଙ୍ଗ କୋହଲି । ପୁଣିଥରେ ନେତୃତ୍ୱ ଗ୍ରହଣ କରିବାକୁ ବିରାଟ ପ୍ରସ୍ତୁତ ଥିବା ଜାଣିବାକୁ ମିଳିଛି । ତେଣୁ ଆଇପିଏଲ-୨୦୨୫ରେ ଆରସିବି ପୁଣିଥରେ ବିରାଟଙ୍କୁ ନେତୃତ୍ୱ ପ୍ରଦାନ କରିବାର ସମ୍ଭାବନା ଖୁବ ଅଧିକ ରହିଛି ।
ତେବେ ବିରାଟ ଦଳର ଅଧିନାୟକ ଦାୟିତ୍ୱ ଗ୍ରହଣ କଲେ, ଫାଫ୍ ଡୁପ୍ଲେସିସଙ୍କୁ ଦଳ ମେଗା ଅକ୍ସନ ପାଇଁ ରିଲିଜ କରିପାରେ । ଆଇପିଏଲ-୨୦୨୫ ପାଇଁ ରିଟେନସନ ତାଲିକା ଘୋଷଣାର ଶେଷ ତାରିଖ ଅକ୍ଟୋବର ୩୧ ତାରିଖ ରହିଛି । ତେବେ ବିରାଟଙ୍କ ଏହି ନିଷ୍ପତ୍ତି ପରେ ଡୁପ୍ଲେସିସଙ୍କୁ ଦଳ ରିଟେନ୍ କରିବା ନେଇ ସନ୍ଦେହ ସୃଷ୍ଟି ହୋଇଛି । ୨୦୧୩ ମସିହାରୁ ୨୦୨୧ ପର୍ଯ୍ୟନ୍ତ ବିରାଟଙ୍କ ନେତୃତ୍ୱରେ ଆରସିବି ୧୪୩ଟି ମ୍ୟାଚ୍ ଖେଳିଥିବା ବେଳେ ୬୦ଟି ମ୍ୟାଚରେ ବିଜୟୀ ହୋଇଛି । ଏହାବ୍ୟତୀତ ୭୦ଟି ମ୍ୟାଚରେ ଦଳ ପରାସ୍ତ ହୋଇଥିବା ବେଳେ ୩ଟି ମ୍ୟାଚ ଟାଇ ରହିଛି । ତେବେ ଆଇପିଏଲରେ ଗୋଟିଏ ଦଳ ପାଇଁ କନଷ୍ଟାଣ୍ଟଲି ପ୍ରତ୍ୟେକ ସିଜନ ଖେଳିଥିବା ଏକମାତ୍ର ଖେଳାଳି ଭାବେ ରହିଛନ୍ତି ବିରାଟ କୋହଲି।
ଅଧିକ ପଢ଼ନ୍ତୁ କ୍ରୀଡ଼ା ଖବର
