ସଂସଦରେ କଂଗ୍ରେସ ନେତାଙ୍କ ହଙ୍ଗାମାର ହେବ ଯାଂଚ୍, ଗଠନ ହେଲା ସ୍ଵତନ୍ତ୍ର କମିଟି

ନୂଆଦିଲ୍ଲୀ : ଲୋକସଭାରେ ଦିଲ୍ଲୀ ହିଂସାକାଣ୍ଡକୁ ନେଇ ଚର୍ଚ୍ଚା କରିବାକୁ ଦାବି କରି କଂଗ୍ରେସ, ଡିଏମକେ, ସିପିଆଇ ସମେତ ଅନ୍ୟ କେତେକ ବିରୋଧୀ ଦଳ ସଦସ୍ୟ ଗତ ଶୁକ୍ରବାର ହଙ୍ଗାମା କରିଥିଲେ। ଏଥିପାଇଁ ଗୃହ କିଛି ସମୟ ଚାଲିବା ପରେ ଦ୍ଵିପ୍ରହର 12ଟା ଯାଏଁ ସ୍ଥଗିତ ହୋଇଥିଲା। ଏହାପରେ ପୁଣି ଥରେ ଗୃହ କାର୍ଯ୍ୟ ଚାଲିବା ପରେ ସଂସଦୀୟ କାର୍ଯ୍ୟମନ୍ତ୍ରୀ ପ୍ରହ୍ଲାଦ ଜୋଶୀ କହିଛନ୍ତି ଯେ, ମାର୍ଚ୍ଚ 2ରୁ 5 ଯାଏଁ ଗୃହରେ ଘଟିଥିବା ସମସ୍ତ ଘଟଣାର ଯାଂଚ୍ ପାଇଁ ଏକ କମିଟି ଗଠନ କରାଯାଇଛି। ବାଚସ୍ପତି ଖୋଦ୍ ଏହାର ଅଧ୍ୟକ୍ଷତା କରିବେ। ଏହି କମିଟିରେ ସବୁ ଦଳର ପ୍ରତିନିଧିମାନେ ସାମିଲ ରହିବେ।

ଅପର ପକ୍ଷରେ ରାଜ୍ୟସଭାକୁ ମାର୍ଚ୍ଚ 11 ଯାଏଁ ସ୍ଥଗିତ ରଖାଯାଇଛି। ଲୋକସଭାରେ କଂଗ୍ରେସ ସାଂସଦ କଳା ପଟି ବାନ୍ଧି ପହଁଚିଛନ୍ତି। ସେମାନେ ରାହୁଲ ଗାନ୍ଧୀଙ୍କ ସହ ସଂସଦ ପରିସରରେ ଗାନ୍ଧୀ ପ୍ରତିମା ସାମ୍ନାରେ ବିରୋଧ ପ୍ରଦର୍ଶନ କରୁଛନ୍ତି। ତେବେ ସଂସଦର ବଜେଟ୍ ଅଧିବେଶନର ଦ୍ଵିତୀୟ ପର୍ଯ୍ୟାୟ ଆରମ୍ଭରୁ କଂଗ୍ରେସ ସହିତ ଅନ୍ୟ ବିରୋଧୀ ଦଳ ଗୃହରେ ଦିଲ୍ଲୀ ହିଂସାକୁ ନେଇ ତତ୍କାଳ ଚର୍ଚ୍ଚା କରିବାକୁ ଦାବି କରି ହଙ୍ଗାମା କରୁଥିଲେ। ଏପରିକି ସେମାନେ ଗୃହ ମନ୍ତ୍ରୀ ଅମିତ ଶାହଙ୍କ ଇସ୍ତଫା ଦାବି କରିଥିଲେ।

ରାଜ୍ୟସଭାରେ କଂଗ୍ରେସର ହଙ୍ଗାମା କାରଣରୁ ମାର୍ଚ୍ଚ 11 ଯାଏଁ ଗୃହକାର୍ଯ୍ୟ ସ୍ଥଗିତ ରଖାଯାଇଛି। କଂଗ୍ରେସ, ଡିଏମକେ, ତୃଣମୂଳ, ଆପ, ଏସପି, ଓ ବାମ ଦଳର ସଦସ୍ୟମାନେ ଦିଲ୍ଲୀ ହିଂସାକୁ ନେଇ ହଙ୍ଗାମା କରିଥିଲେ। ଗୃହରେ ହୋହାଲ୍ଲା ବନ୍ଦ ନହେବାରୁ ଆସନ୍ତା ବୁଧବାର ଯାଏଁ ଗୃହ ସ୍ଥଗିତ ରଖିଛନ୍ତି ବାଚସ୍ପତି।