ଉତ୍ତରପ୍ରଦେଶର ପ୍ରଜ୍ଞାପନ ମେଢ଼କୁ ପ୍ରଥମ ପୁରସ୍କାର

by Rakesh Kumar Barik

ଅର୍ଗସ ବ୍ୟୁରୋ: ଉତ୍ତରପ୍ରଦେଶର ପ୍ରଜ୍ଞାପନ ମେଢ଼କୁ ପ୍ରଥମ ପୁରସ୍କାର । ଚଳିତ ବର୍ଷ ଗଣତନ୍ତ୍ର ଦିବସ ଅବସରରେ ଦିଲ୍ଲୀ ରାଜପଥରେ ହୋଇଥିବା ଜାତୀୟ ପ୍ୟାରେଡ଼୍‌ରେ ଭାଗ ବିଭିନ୍ନ ରାଜ୍ୟ ଓ କେନ୍ଦ୍ର ଶାସିତ ଅଂଚଳର ୧୭ ଟି ପ୍ରଜ୍ଞାପନ ମେଢ଼ ଭାଗ ନେଇଥିଲେ । ସେହି ମେଢ଼ଗୁଡ଼ିକ ମଧ୍ୟରୁ ଉତ୍ତରପ୍ରଦେଶ ସରକାରଙ୍କ ଦ୍ୱାରା ପ୍ରଦର୍ଶିତ ମେଢ଼ ଯାହା ଅଯୋଧ୍ୟାର ସାଂସ୍କୃତିକ ଐତିହ୍ୟ ଓ ଗୌରବ ସହ ଜଡ଼ିତ ସବୁଠୁଁ ଅଧିକ ଦୃଷ୍ଟି ଆକର୍ଷଣ କରିଥିଲା । ଏହି କାରଣରୁ ଉକ୍ତ ମେଢ଼କୁ ମିଳିଛି ଚଳିତ ବର୍ଷ ଶ୍ରେଷ୍ଠ ପ୍ରଜ୍ଞାପନ ମେଢ଼ର ସମ୍ମାନ ମିଳିଛି।

ଅତ୍ୟନ୍ତ ଆକର୍ଷକ ଭାବରେ ସଜ୍ଜା ହୋଇଥିବା ଏହି ମେଢ଼ର ଆଗ ଭାଗରେ ମହର୍ଷି ବାଲ୍ମିକୀ ବସି ରାମାୟଣ ଲେଖୁଥିବାର ଦୃଶ୍ୟ ପ୍ରଦର୍ଶିତ ହୋଇଥିଲା । ଠିକ୍ ସେହିପରି ଅଯୋଧ୍ୟାର ଦୀପୋତ୍ସବ, ପ୍ରଭୁ ଶ୍ରୀରାମ ନିଷାଦରାଜଙ୍କୁ କୃତଜ୍ଞତାର ସହ ଆଲିଙ୍ଗନ, ଶବରୀଠାରୁ କୋଳି ଖାଇବା, ଅହଲ୍ୟାର ଶାପମୁକ୍ତି, ହନୁମାନଙ୍କ ସଞ୍ଜିବନୀ ବୁଟି ଆଣିବା, ଜଟାୟୂଙ୍କ ସହ ଆଳାପ ଏବଂ ଅଶୋକ ବାଟିକା ଇତ୍ୟାଦି ପ୍ରଦର୍ଶିତ ହୋଇଥିଲା

ପ୍ରଭୁ ଶ୍ରୀରାମଚନ୍ଦ୍ର କିପରି ସମାଜର ସବୁବର୍ଗର ଲୋକଙ୍କୁ କୋଳେଇ ନେଇ ସାମାଜିକ ସଂହତିର ବାର୍ତା ପ୍ରଦାନ କରିଥିଲେ ଏହା ମାଧ୍ୟମରେ ପ୍ରଦର୍ଶିତ କରା ଯାଇଥିଲା । ତେବେ ଏଥିରେ ଅଯୋଧ୍ୟାର ପ୍ରସ୍ତାବିତ ରାମମନ୍ଦିରର ପ୍ରତିକୃତ ଏକ ପ୍ରମୁଖ ଆକର୍ଷଣ ସାଜିଥିଲା।

ତେବେ ଦୁଃଖର କଥା ହେଲା ଗଣତନ୍ତ୍ର ଦିବସ ଅବସରରେ ଦିଲ୍ଲୀ ରାଜପଥରେ ଘଟିଥିବା ଟ୍ରାକ୍ଟର ରାଲି ହିଂସାକାଣ୍ଡରେ ଅନେକ ରାଜ୍ୟର ପ୍ରଜ୍ଞାପନ ମେଢ଼ଗୁଡ଼ିକ କ୍ଷତିଗ୍ରସ୍ତ ହୋଇ ପଡ଼ିଥିଲା । ହିଂସା ସୃଷ୍ଟିକାରୀମାନେ ଉତ୍ତରପ୍ରଦେଶର ଏହି ମେଢ଼କୁ ମଧ୍ୟ ଟାର୍ଗେଟ୍ କରିବାକୁ ଭୁଲିନଥିଲେ । ଭଙ୍ଗାରୁଜାରେ ରାମମନ୍ଦିରର ମଡ଼େଲ ମଧ୍ୟ କ୍ଷତିଗ୍ରସ୍ତ ହୋଇଥିବାର ଜଣାପଡ଼ିଛି ।