ଅର୍ଗସ ବ୍ୟୁରୋ : କଟକ ମଙ୍ଗୁଳି ଟୋଲ୍ଗେଟ୍ ନିକଟରୁ ଜବତ ହେଲା ୯ କିଲୋରୁ ଅଧିକ ବିଦେଶୀ ସୁନା । ଏହି ଚାଲାଣ ଘଟଣାରେ ୨ ଗିରଫ ହୋଇଥିବା ବେଳେ ଡିଆରଆଇ ସୁନା ବିସ୍କୁଟ୍ ଓ ଏକ କାର୍ ଜବତ କରିଛି । କାର ଯୋଗେ କୋଲକାତାରୁ ସୁନା ଚୋରା ଚାଲାଣ ହେଉଥିବା ନେଇ ଡିଆରଆଇକୁ ବିଶ୍ବସ୍ତ ସୂତ୍ରରୁ ସୂଚନା ମିଳିଥିଲା । ଡିଆରଆଇର କର୍ମଚାରୀମାନେ କଟକ ଜିଲ୍ଲା ମଙ୍ଗୁଳି ଟୋଲ୍ ପ୍ଲାଜା ନିକଟରେ ଛକି ବସିଥିଲେ । ସୁନା ଚାଲାଣ ହେଉଥିବା କାର୍ ଯେତେବେଳେ ଘଟଣାସ୍ଥଳକୁ ପହଞ୍ଚିଥିଲା, ଏଠାରେ ଥିବା କର୍ମଚାରୀମାନେ କାରକୁ ଅଟକାଇଥିଲେ ।
ଅଧିକ ପଢନ୍ତୁ ଓଡ଼ିଶା ଖବର
ଯାଞ୍ଚ ବେଳେ କାର୍ ଭିତରୁ ୯ ହଜାର ୧୮୦ ଗ୍ରାମର ସୁନା ବିସ୍କୁଟ ମିଳିଥିଲା, ଯାହାର ମୂଲ୍ୟ ୬ କୋଟି ୪୪ ଲକ୍ଷ ୪୬ ହଜାର ୧୬୪ ଟଙ୍କା ହେବ। ଏହି ଘଟଣାରେ ୨ ଜଣଙ୍କୁ ଗିରଫ କରିଛି ଡିଆରଆଇ । ଚୋରାଚାଲାଣ ହେଉଥିବା ଗାଡି ବି ଜବତ କରାଯାଇଛି । ତେବେ ଅଭିଯୁକ୍ତମାନେ ସୁନାକୁ କେଉଁଠାକୁ ନେଉଥିଲେ ରିପୋର୍ଟ ଲେଖାଯିବା ପର୍ଯ୍ୟନ୍ତ ଜଣାପଡ଼ି ନାହିଁ । ତଦନ୍ତ ପରେ ଏହା ଜଣାପଡ଼ିବ ବୋଲି ଡିଆରଆଇ ପକ୍ଷରୁ କୁହାଯାଇଛି ।
ଅର୍ଗସ ବ୍ୟୁରୋ: ରାଜ୍ୟରେ ବିଭିନ୍ନ ସ୍ଥାନରେ ହାଲୁକାରୁ ମଧ୍ୟମ ଧରଣର ବର୍ଷା ହୋଇଥିବା ବେଳେ ଆଗାମୀ ୫ ଦିନ ଯାଏ ବର୍ଷା ଜାରି ରହିବ ବୋଲି ପୂର୍ବାନୁମାନ କରିଛି ପାଣିପାଗ ବିଭାଗ। ତେବେ ଓଡିଶା ଠାରୁ ଦକ୍ଷିଣ ପୂର୍ବ ରାଜସ୍ଥାନ ଓ ଛତିଶଗଡ଼ ଉପର ଦେଇ ଏକ ଟ୍ରପ ଲାଇନ ରହୁଛି। ଏହାର ପ୍ରଭାବରେ ରାଜ୍ୟର ଅନେକ ସ୍ଥାନରେ ବର୍ଷା ହେଉ ଥିବା ବେଳେ ଆସନ୍ତା୨୪ ଘଣ୍ଟାରେ ମୂରଭଞ୍ଜ, କେନ୍ଦୁଝର ,ବାଲେଶ୍ୱର ,ଭଦ୍ରକ, ଗଞ୍ଜାମ,ଗଜପତି ,କୋରାପୁଟ ଓ ନବରଙ୍ଗପୁର ଜିଲ୍ଲାର ଅନେକ ସ୍ଥାନରେ ବିଜୁଳି ଘଡ଼ଘଡ଼ି ସହ ବର୍ଷା ହେବାର ସଙ୍କେତ ଦେଇଛି ପାଣିପାଗ ବିଭାଗ।
ଏହି ସମୟରେ ପବନର ବେଗ ୪୦ ରୁ ୫୦ କିମି ରହିବା ସହ ଗୋଟିଏ କିମ୍ବା ଦୁଇଟି ସ୍ଥାନରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ତେଣୁ ଏହି ସବୁ ଜିଲ୍ଲାକୁ ଅରେଞ୍ଜ ଓ୍ବାର୍ଣ୍ଣିଙ୍ଗ ଜାରି କରିଛି ପାଣିପାଗ ବିଭାଗ। ଏହାସହ ଉତ୍ତର ଆଭ୍ୟନ୍ତରୀଣ ଜିଲ୍ଲାଗୁଡିକର କିଛି କିଛି ସ୍ଥାନରେ ମଧ୍ୟ ସମାନ ସ୍ଥିତି ରହିବ। ସେହିପରି ଆସନ୍ତାକାଲି ବିଜୁଳି ଘଡଘଡି ସହ ବର୍ଷା ଓ ଝଡିପବନ ହେବ। ଗୋଟିଏ କିମ୍ବା ଦୁଇଟି ସ୍ଥାନରେ ପ୍ରବଳ ବର୍ଷାର ସମ୍ଭାବନା ରହିଥିବା ବେଳେ ମୟୁରଭଞ୍ଜ କେନ୍ଦୁଝର, ଅନୁଗୁଳ, କନ୍ଧମାଳ, ଗଞ୍ଜାମ, ଗଜପତି ଓ ରାୟଗଡା ଜିଲ୍ଲାକୁ ମଧ୍ୟ ଅରେଞ୍ଜ ଓ୍ବାର୍ଣ୍ଣିଙ୍ଗ ଜାରିକରିଛି ପାଣିପାଗ ବିଭାଗ। ୯ ତାରିଖରେ ମୟୁରଭଞ୍ଜ କେନ୍ଦୁଝର ଢେଙ୍କାନାଳ ଯାଜପୁର ଭଦ୍ରକ ବାଲେଶ୍ୱର ଜିଲ୍ଲାକୁ ୟେଲୋ ଓ୍ବାର୍ଣ୍ଣିଙ୍ଗ ରହିଛି। ବିଶେଷ ଭାବେ ଉପକୂଳ ଓଡିଶା ଓ ତାର ପାଶ୍ୱବର୍ତ୍ତୀ ଏବଂ ଆଭ୍ୟନ୍ତରୀଣ ଓଡିଶା ର କିଛି ସ୍ଥାନରେ ବର୍ଷାର ସମ୍ଭାବନା ଆଗାମୀ ୩ ଦିନ ଯାଏ ବିସ୍ତାରିତ ବର୍ଷା ପାଇଁ ଓ୍ବାର୍ଣ୍ଣିଙ୍ଗ ରହିଛି। ଏହି ସମୟରେ ୪ ରୁ ୬ ଡିଗ୍ରୀ ତାପମାତ୍ରା ହ୍ରାସ ପାଇବ ବୋଲି ବିଭାଗ ଆକଳନ କରିଛି ।
ଅନ୍ୟପଟେ ରାଜ୍ୟରେ ଆଜିଠାରୁ ବର୍ଷାର ପ୍ରଭାବ ରହିଥିବା ବେଳେ ୭ ରୁ ୧୨ ତାରିଖ ଯାଏ ରାଜ୍ୟର ବିଭିନ୍ନ ଜିଲ୍ଲାରେ ବର୍ଷା ରହିବ । ଏହାସହ ଉତ୍ତର ଉପକୂଳ ଓଡିଶା-ପାର୍ଶ୍ଵବର୍ତ୍ତୀ ଅଞ୍ଚଳରେ ପବନର ବେଗ ୪୦ ରୁ ୫୦ କିମି ବେଗରେ ରହିବାର ସମ୍ଭାବନା ଥିବାରୁ ସମୁଦ୍ର ଅଶାନ୍ତ ରହିବ। ଆସନ୍ତା ୨୪ଘଣ୍ଟା ଯାଏ ମତ୍ସ୍ୟଜୀବୀଙ୍କୁ ସମୁଦ୍ର ମଧ୍ୟକୁ ଯିବାକୁ ବାରଣ କରାଯାଇଛି।
ଅଧିକ ପଢ଼ନ୍ତୁ ପାଣିପାଗ ଖବର
ଅର୍ଗସ ବ୍ୟୁରୋ: ଅତାବିରା ବ୍ଲକ ଟାଙ୍ଗରପାଲିର ଏହି କେନାଲକୁ ଦେଖନ୍ତୁ। କଙ୍କ୍ରିଟକରଣ ନାଁରେ ପଲିଥିନ୍ ଦେଇ ଉପରେ ଗେଟି ଓ ସିମେଣ୍ଟର କଙ୍କ୍ରିଟ କରିଦେଇ ଉଠାଯାଇଛି କୋଟି କୋଟି ଟଙ୍କାର ବିଲ୍। ତଳେ କେବଳ ବାଲି ପ୍ୟାକିଂ ହୋଇଛି । ଏମିତି କଙ୍କ୍ରିଟ ଯେ ହାତରେ ଟାଣିଦେଲେ ଉଠିଯାଉଛି।
ଆଶ୍ଚର୍ଯ୍ୟର କଥା ହେଉଛି 15 କିମି କେନାଲରେ ଏଭଳି କଂକ୍ରିଟ କରିଛି ଏକ ଠିକା ସଂସ୍ଥା । ଏତେ ନିମ୍ନ ମାନର କାମ ହେଲା କେମିତି ? କାମର ତଦାରଖ କିଏ କରିଥିଲା ? କାମକୁ ନେଇ ବାରମ୍ବାର ଅଭିଯୋଗ କରାଯାଇଥିଲେ ମଧ୍ୟ ନା ନେତା ଶୁଣିଲେ ନା ବାବୁ । ନିମ୍ନମାନର କାମ ପାଇଁ ଏବେ ପାଣି ଲିକ୍ କରୁଛି, ଫ୍ଲୋ କମୁଛି ଆଉ ଚାଷୀଙ୍କ ସୁନାର ଫସଲ ମରିଯାଉଛି। ଏପଟେ ଅତାବିରା କେନାଲ ସବ୍ ଡିଭିଜନ ଏସଡିଓ ମଧ୍ୟ ମେଣ୍ଟେନାନ୍ସକୁ ନେଇ ତ୍ରୁଟି ଥିବା ମାନୁଛନ୍ତି। କାହାର ତ୍ରୁଟି ପଚାରିଲେ ନୀରବ ରହୁଛନ୍ତି।
ବଡ଼କଥା ହେଲା ପ୍ରତିବର୍ଷ କେନାଲ କଂକ୍ରିଟକରଣ ଓ ମେଣ୍ଟେନାନ୍ସ ନାଁରେ ଲୁଟ୍ ହେଉଛି କୋଟି କୋଟି ହେଲେ ନେତା ଚୁପ୍ ବାବୁମାନେ ବି ଚୁପ୍ । ସାଧାରଣରେ ଚର୍ଚ୍ଚା ହେଉଛି। କୁଆଡ଼େ ସମସ୍ତଙ୍କୁ ବରାବର ଭାଗ ମିଳୁଛି। ଭାତହାଣ୍ଡିରେ ମରୁଡ଼ି ଆଶଙ୍କା। ଶହଶହ ଏକର ଜମି ନଷ୍ଟ ପରେ 15 ତାରିଖ ପର୍ଯ୍ୟନ୍ତ କେନାଲ ପାଣି ଦେଇ ଚାଷୀଙ୍କ ଆକ୍ରୋଶ ନିଆଁକୁ ଲିଭାଇବାକୁ ଚାଲିଛି ଚେଷ୍ଟା। ହେଲେ ଠିକ୍ ସମୟରେ କେନାଲ ପାଣି ବନ୍ଦ କରିଦେବାରୁ କ୍ଷତି ସହିଛନ୍ତି ଶହଶହ ଚାଷୀ। ତେବେ କେନାଲରେ ପାଣି ଫ୍ଲୋ କମିବାର କାରଣ ମଧ୍ୟରେ ପ୍ରମୁଖ କାରଣ ହେଲା କଙ୍କ୍ରିଟକରଣ ପରେ ମଧ୍ୟ ପାଣି ଲିକ୍ ହେବା। ମାଡାମ ସ୍ନେହାଙ୍ଗିନୀଙ୍କ ନାକତଳେ କେନାଲକୁ ମାରିସାରିଲେଣି। ଅଥଚ ମାଡାମ ଚୁପ୍ କାହିଁକି ବୋଲି ଉଠୁଛି ପ୍ରଶ୍ନ।
ଭାତହାଣ୍ଡିର ଆଖ୍ୟା ପାଇଥିବା ବରଗଡ଼ ଜିଲ୍ଲାର ଅତାବିରା ଓ ଭେଡେନ ବ୍କକ ମରୁଡ଼ି ଅଞ୍ଚଳ ପାଲଟିଯିବ କି ? ନେତା ଓ ବାବୁଙ୍କ ଲୁଟ ପାଇଁ ଚାଷୀ କେତେ କ୍ଷତି ସହିବେ ।
ଅଧିକ ପଢ଼ନ୍ତୁ ଓଡ଼ିଶା ଖବର
