ଅର୍ଗସ ବ୍ୟୁରୋ: ଓ୍ବାକଫ୍ ସଂଶୋଧନ ବିଲ୍ ପାଇଁ ଗଠିତ ଯୁଗ୍ମ ସଂସଦୀୟ କମିଟିର ଦ୍ବିତୀୟ ବୈଠକ ହେବାକୁ ଯାଉଛି । ଆସନ୍ତା 19 ତାରିଖରୁ ପାଟନା ଲ କଲେଜରେ 2 ଦିନିଆ ବୈଠକ ଆରମ୍ଭ ହେବ । ବିଲ୍ ସଂଶୋଧନକୁ ନେଇ ଆଜି ସୁଦ୍ଧା JPCକୁ ଇମେଲ୍ ମାଧ୍ୟମରେ ସାରା ଦେଶରୁ 84 ଲକ୍ଷ ପ୍ରସ୍ତାବ ମିଳିଛି । ଏହାବ୍ୟତୀତ ବହୁ ସଂଖ୍ୟାରେ ଲିଖିତ ପ୍ରସ୍ତାବ ମଧ୍ୟ ମିଳିଛି । ମତାମତ ଓ ପ୍ରସ୍ତାବ ଦେବାପାଇଁ ଆଜି ଶେଷ ତାରିଖ ରହିଛି ।
ପରବର୍ତ୍ତୀ ବୈଠକ ଗୁଡ଼ିକ ଦେଶର ବିଭିନ୍ନ ସହରରେ 26 ସେପ୍ଟେମ୍ବରରୁ 1 ଅକ୍ଟୋବର ମଧ୍ୟରେ ହେବ । ଯୁଗ୍ମ ସଂସଦୀୟ କମିଟି ପକ୍ଷରୁ ମୁମ୍ବାଇ, ହାଇଦ୍ରାବାଦ, ଚେନ୍ନାଇ, ବେଙ୍ଗାଳୁରୁ, ଅହମ୍ମଦାବାଦ ସମେତ ବିଭିନ୍ନ ସହରରେ ଜନତାଙ୍କୁ ମତାମତ ଦେବା ପାଇଁ ଆହ୍ବାନ ଦେଇଥିଲା । ପୂର୍ବରୁ ଗତ ମାସରେ ଯୁଗ୍ମ ସଂସଦୀୟ କମିଟିର ପ୍ରଥମ ବୈଠକ ଜଗଦମ୍ବିକା ପାଲଙ୍କ ଅଧ୍ୟକ୍ଷତାରେ ହୋଇଥିଲା । ପ୍ରଥମ ବୈଠକରେ ୪୪ଟି ସଂଶୋଧନ ପ୍ରସ୍ତାବ ଉପରେ ବିସ୍ତୃତ ଆଲୋଚନା ହୋଇଥିଲା । କମିଟିରେ 21 ଲୋକସଭା ଓ 10 ରାଜ୍ୟସଭା ସଦସ୍ୟ ସାମିଲ ଅଛନ୍ତି ।
ସଂଶୋଧିତ ଆଇନକୁ ନେଇ ବିରୋଧୀଙ୍କ ଅଭିଯୋଗ ଓ ଦାବି ପରେ ସଂଶୋଧନ ବିଲ୍ ର ପୂର୍ଣ୍ଣାଙ୍ଗ ଯାଞ୍ଚ ପାଇଁ ଜେପିସିକୁ ପଠାଇଦେଇଥିଲେ ମୋଦି ସରକାର । ୱାକଫ ବିଲ୍ ଆଇନରେ ପରିଣତ ହେଲେ ମାଫିଆଙ୍କ କବଜାରୁ ମୁକ୍ତହେବ ୱକଫ୍ ବୋର୍ଡର ଅଧିକାର ।
