ଲୋୟର ସୁକତେଲ ପ୍ରକଳ୍ପକୁ ନେଇ ବିଧାନସଭାରେ ଶାସକ ଦଳ ଓ ବିରୋଧୀ ମୁହାଁମୁହିଁ ହୋଇଛନ୍ତି । ବିଧାନସଭାରେ ବିଜେପି ସରକାରକୁ ପ୍ରଶ୍ନ କରି ଫସିଯାଇଛନ୍ତି ବିଜେଡି ବିଧାୟକ ନିରଞ୍ଜନ ପୂଜାରୀ । ବିଜେଡି ବିଧାୟକ ନିରଞ୍ଜନ ପୂଜାରୀଙ୍କ ପ୍ରଶ୍ନର ଉତ୍ତର ଦେଇ ପୂର୍ବ ବିଜେଡି ସରକାର ପୋଲ ଖୋଲିଲେ ଉପ ମୁଖ୍ୟମନ୍ତ୍ରୀ କେଭି ସିଂଦେଓ ଏବଂ ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ । ଉପମୁଖ୍ୟମନ୍ତ୍ରୀ ଓ ସଂସଦୀୟ ବ୍ୟାପାର ମନ୍ତ୍ରୀ କହିଛନ୍ତି, ଲୋୟର ସୁକେତେଲ ପ୍ରକଳ୍ପକୁ ନିର୍ବାଚନ ପାଇଁ ତରବରିଆ ଉଦଘାଟନ କରାଯାଇଥିଲା । ଡିପିଆର ଅନୁଯାୟୀ ୨୦୨୬ ପୂର୍ବରୁ ଏହି ପ୍ରକଳ୍ପ କାର୍ଯ୍ୟକାରୀ ହେବା କଥା ନୁହେଁ । ବର୍ତ୍ତମାନ ବିଧାୟକ ଯେଉଁ ଏହି ପ୍ରକଳ୍ପର ପାଣି ଲୋକଙ୍କ ପାଖରେ ପହଞ୍ଚିଥିବା କହୁଛନ୍ତି ତାହା ଠିକ ନୁହେଁ । ବାସ୍ ମନ୍ତ୍ରୀଙ୍କ ଏମିତି ରୋକଠୋକ ଉତ୍ତରରେ ସତେ ଯେମିତି ଶାସକ ଦଳ ବିଧାୟକଙ୍କ ମୁହଁ ଝାଉଁଳି ପଡିଥିଲା ।
ମୋଟ୍ ଉପରେ ଲୋୟର ସୁକତେଲକୁ ନେଇ ବିଜେଡି ରାଜନୀତି କରୁଥିଲା । ନିର୍ବାଚନି ବର୍ଷ ହୋଇଥିବାରୁ ପ୍ରକଳ୍ପ ପରେ ପ୍ରକଳ୍ପ ଘୋଷଣା କରିଥିଲା ବିଜେଡି ସରକାର । ହେଲେ ବାସ୍ତବତା କେତେ ଅଛି ତାହାକୁ ଖୋଦ ସଭାରେ ଦେଖାଇଥିଲେ ବଲାଙ୍ଗିରର ତତ୍କାଳୀନ ବିଧାୟକ ନରସିଂହ ମିଶ୍ର । ପ୍ରକଳ୍ପ ଯଦି ସରିଛି ତେବେ ସ୍ଵିଚ୍ ଚିପିଲେ ପାଣି ଘଳଘଳ ହୋଇକି ପାଣି ବାହାରିବ ବୋଲି ନରସିଂହ କହିବା ସହ ଯଦି ପାଣି ନବାହିରବ ଲୋକ ମୁହଁରେ କଳା ବୋଳି ଦେବେ ବୋଲି କହିବାକୁ ପଛାଇ ନଥିଲେ ।
୧୯୯୮ରେ ସୁକତେଲ ପାଇଁ ମିଳିଥିଲା ମଞ୍ଜୁରୀ । ୧୯୯୯ ରେ ଶୁଭ ଦେବାର ଥିଲା । ହେଲା ନିର୍ବାଚନ ଘୋଷଣା ହେବାରୁ କାମ ଘୁଞ୍ଚିଯାଇଥିଲା । ହେଲେ ଆଜକୁ ୨୪ ବର୍ଷ ହେଇଗଲା ,ପ୍ରକଳ୍ପ ସଂପୂର୍ଣ୍ଣ ହେଲାନି । କିନ୍ତୁ ଦୁର୍ଭାଗ୍ୟର କଥା ଅସମ୍ପୂର୍ଣ୍ଣ ପ୍ରକଳ୍ପକୁ ତରତର ହୋଇ ଉଦଘାଟନ କରିଥିଲେ ନବୀନ ବାବୁ । ଖାଲି ଏତିକି ନୁହେଁ ବରଂ ୨୦୦୬ରେ ମୁଖ୍ୟମନ୍ତ୍ରୀ ବିଧାନସଭାରେ ଘୋଷଣା କରିଥିଲେ ଯେ ପ୍ରତ୍ୟେକ ବ୍ଲକର ୩୫ ପ୍ରତିଶତ ଜମିକୁ ଜଳସେଚନ କରାଯିବ । ୫ ବର୍ଷ ଭିତରେ ଅର୍ଥାତ୍ ୨୦୧୧ ସୁଦ୍ଧା ସବୁ ଜମିକୁ ପାଣି ମାଡିବାର କଥା । ହେଲେ ଆଜି ଯାଏ ସବୁ ବ୍ଲକକୁ ପାଣି ଗଲା ନାହିଁ । ପ୍ରକଳ୍ପ ଯୋଗୁଁ ୧୫ଟି ଗାଁ ସଂପୂର୍ଣ୍ଣ ଓ ୧୩ଟି ଗାଁ ଆଂଶିକ ଭାବେ ପ୍ରଭାବିତ ହୋଇଛି । ପ୍ରାୟ ୧୦ ହଜାର ଲୋକ ବିସ୍ଥାପିତ ହୋଇଛନ୍ତି । ହେଲେ ନିଜ ସରକାରର ପାପ ଲୁଚାଇବାକୁ ନିରଞ୍ଜନ ଚେଷ୍ଟା କରିବା ପରେ ଗୃହରେ କିନ୍ତୁ ପୋଲ ଖୋଲିଦେଇଛନ୍ତି ମନ୍ତ୍ରୀ ଯାହାକୁ ନେଇ ଚର୍ଚ୍ଚା ଜୋର ।