ଅର୍ଗସ ବ୍ୟୁରୋ: ପୁରୀ ଜିଲ୍ଲା ନିମାପଡା ବ୍ଲକ ବାମନାଳ ପଞ୍ଚାୟତର ଆମ୍ବିଳିହଣା,ଓଲମରା ସହିତ ଆଖପାଖ ଅଞ୍ଚଳରେ ବାରାହା ଆତଙ୍କ ଦେଖା ଦେଇଛି। 10 ରୁ 15 ବାରାହା ସ୍ଥାନୀୟ ଜଙ୍ଗଲରେ ଲୁଚି ରହି ରାତ୍ର ସମୟରେ ଫସଲ ନଷ୍ଟ କରୁଥିବା ଅଭିଯୋଗ କରିଛନ୍ତି ସ୍ଥାନୀୟ ଚାଷୀ। ଚାଷ ଜମିରେ ବାରାହାଙ୍କ ପାଦଚିହ୍ନ ଦେଖି ଚାଷୀମାନେ ରାତ୍ର ସମୟରେ ଜଗିରହି ସେମାନଙ୍କୁ ଘଉଡ଼ାଇବାକୁ ଉଦ୍ୟମ କରୁଥିବା ବେଳେ ଚାଷୀମାନଙ୍କୁ ମଧ୍ୟ କାମୁଡ଼ିବାକୁ ଗୋଡ଼ାଉଛନ୍ତି ବାରହା। ଯାହା ଦ୍ୱାରା ଚାଷୀ ମାନେ ଭୟରେ ରାତିରେ ବିଲକୁ ଯାଇ ପାରୁନାହାନ୍ତି।
ଚଳିତ ବର୍ଷ ଫସଲ ଭଲ ହୋଇଥିବା ବେଳେ ବାରହାମାନେ ଫସଲ ନଷ୍ଟ କରୁଥିବାରୁ ଚାଷୀ ମାନଙ୍କ ଭିତରେ ଭାଳେଣି ପଡିଯାଇଛି।ଯେଉଁଥି ପାଇଁ ଚାଷୀ ମାନେ ଏବେ ଚିନ୍ତାରେ ପଡିଛନ୍ତି।ଏନେଇ ଚାଷୀମାନେ ଅନେକ ଥର ବନ ବିଭାଗକୁ ଅଭିଯୋଗ ଜଣାଇଥିବା ବେଳେ ବିଭାଗୀୟ ଅଧିକାରୀ ମାନେ ବାରାହାକୁ କାବୁ କରିବାରେ ବିଫଳ ହୋଇଥିବା ଜଣାପଡିଛି। ତୁରନ୍ତ ଏହି ଘଟଣାକୁ ଗୁରୁତର ସହ ନେଇ ବନ ବିଭାଗର ଅଧିକାରୀମାନେ ବାରାହାକୁ କାବୁ କରିବା ନିମନ୍ତେ ଚାଷୀ ମାନେ ଦାବି କରିଛନ୍ତି।
ଅଧିକ ପଢ଼ନ୍ତୁ ଓଡ଼ିଶା ଖବର
ଅର୍ଗସ ବ୍ୟୁରୋ : ଦାରିଙ୍ଗବାଡି ଆମ୍ବ ଟାକୁଆ ପ୍ରସଙ୍ଗରେ RDC ତଦନ୍ତ ଚାଲିଥିବାବେଳେ ଜୁଡିସିଆଲ୍ କମିଶନ ତଦନ୍ତ ଦାବି କରିଛି ବିଜେଡି । ଯାହାକୁ ନେଇ ପୂର୍ବ ସରକାରର ଜୁଡିସିଆଲ୍ ତଦନ୍ତ ଉପରେ ପ୍ରଶ୍ନ ଉଠାଇବା ସହ ସିଧାସଳଖ ବିଜେଡିକୁ ନିଶାନା କରିଛନ୍ତି ରାଜସ୍ବ ମନ୍ତ୍ରୀ ସୁରେଶ ପୂଜାରୀ । ସେ କହିଛନ୍ତି, ଯେଉଁମାନେ ବିଚାର ବିଭାଗୀୟ ତଦନ୍ତ ଦାବି କରୁଛନ୍ତି। ସେମାନେ ନିଜ ବିବେକକୁ ପଚାରନ୍ତୁ ତାଙ୍କ କାର୍ଯ୍ୟକାଳ ବେଳେ 24ଟି ବିଚାର ବିଭାଗୀୟ ତଦନ୍ତ ହେଲା । ସେ ରିପୋର୍ଟ ସବୁ କୁଆଡେ ଗଲା ? । ଜୁଡିସିଆଲ୍ ହେଉ ଆରଡିସି ହେଉ କି ବିଚାର ବିଭାଗୀୟ ତଦନ୍ତ ହେଉ । ଲକ୍ଷ୍ୟ ହେବା କଥା- ସତ୍ୟର ଉନ୍ମୋଚନ କରିବା ପାଇଁ । କୋଟି କୋଟି ଟଙ୍କା ଖର୍ଚ୍ଚ କରି ଜୁଡ଼ିସିଆଲ କମିଶନ ବସାଇ କୌଣସି ରିପୋର୍ଟ ସାର୍ବଜନୀନ ନକରିବା ପୂର୍ଵ ସରକାରଙ୍କ ରାସ୍ତା ଓ ଲକ୍ଷ୍ୟ ଉଭୟ ଥିଲା ଅପବିତ୍ର । ହେଲେ ବିଜେପି ସରକାରର ଲକ୍ଷ୍ୟ ବି ପବିତ୍ର ରାସ୍ତା ବି ପବିତ୍ର କହି ବିରୋଧୀଙ୍କୁ ଜବାବ ଦେଇଛନ୍ତି ରାଜସ୍ବ ମନ୍ତ୍ରୀ ।
କନ୍ଧମାଳ ଜିଲ୍ଲା ମାଣ୍ଡିପଙ୍କା ଗାଁରେ ଆମ୍ବ ଟାକୁଆ ଦ୍ବାରା ପ୍ରସ୍ତୁତ ଯାଉ ଖାଇ 2 ଜଣଙ୍କ ମୃତ୍ୟୁ ହୋଇଥିବାବେଳେ ୬ ଜଣ ବ୍ରହ୍ମପୁର MKCG ଓ ଦୁଇ ଜଣ କଟକ SCBରେ ଚିକିତ୍ସିତ ହେଉଛନ୍ତି । ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ ପରେ ଘଟଣାର RDC ତଦନ୍ତ ଚାଲିଛି । ଦକ୍ଷିଣାଞ୍ଚଳ RDC ରୂପାରୋଶନ ସାହୁ ଘଟଣାର ତଦନ୍ତ କରୁଛନ୍ତି । ଘଟଣାରେ ପ୍ରତିକ୍ରିୟା ରଖି ରାଜସ୍ବ ମନ୍ତ୍ରୀ ସୁରେଶ ପୂଜାରୀ କହିଛନ୍ତି, ଘଟଣା ଚିନ୍ତାଜନକ । ଜିଲ୍ଲା ରିପୋର୍ଟ ଆସିଛି । ଆରଡ଼ିସି ତଦନ୍ତ କରୁଛନ୍ତି । ସତ ପଦାକୁ ଆସିବ । ଘଟଣା ପଛରେ ଯାହା ବି କାରଣ ଆସିବ ତାର ନିରାକରଣ ହେବ ପ୍ରାଥମିକତା ।
ତେବେ ଦାରିଙ୍ଗବାଡି ଅଞ୍ଚଳରେ ଆମ୍ବ ଟାକୁଆର କୋଇଲିକୁ ପୂର୍ବ କାଳରୁ ଖାଇ ଆସୁଛନ୍ତି ସେଠକାର ବାସିନ୍ଦା । ଆମ୍ବ ଟାକୁଆର କୋଇଲିକୁ ଗୁଣ୍ଡ କରି ସିଜେଇ ଭାତ ସହିତ ଖାଉଛନ୍ତି । ବର୍ଷ ବର୍ଷ ଧରି ଘରେ ରଖୁଥିବା ଟାକୁଆଟି ଶୁଖିଗଲା ପରେ ସେଥିରୁ କୋଇଲି ବାହାର କରି ତାକୁ ରାନ୍ଧି କରି ଖାଉଥିବା କଥା ସ୍ବୀକାର କରିଛନ୍ତି, SCBରେ ଚିକିତ୍ସାଧୀନଙ୍କ ଭାଇ ।
ଅଧିକ ପଢନ୍ତୁ : ଆମ୍ବ ଟାକୁଆ ମୃତ୍ୟୁ ଘଟଣାରେ RDC ତଦନ୍ତ ନିର୍ଦ୍ଦେଶ ଦେଲେ ମୁଖ୍ୟମନ୍ତ୍ରୀ
୨୦୦୧ରେ ରାୟଗଡାର କାଶୀପୁର ଅଂଚଳରେ ଆମ୍ବ ଟାକୁଆ ଖାଇ ୨୪ ଜଣ ମୃତ୍ୟୁବରଣ କରିଥିଲେ । ଏହାର ୧୫ ବର୍ଷ ପରେ 2016 ରେ ସେହି ଅଂଚଳରେ ଜଣେ ଶିଶୁର ମୃତ୍ୟୁ ଆମ୍ବ ଟାକୁଆ ଖାଇ ହୋଇଥିବା ଜଣାପଡିଥିଲା । ତେବେ ସରକାରୀ ସୁବିଧା ପାଇ ବି ପିଢ଼ି ପିଢ଼ି ଧରି ଖାଉଥିବା ଟାକୁଆ ମୋହ ଯୋଗୁଁ ଆଦିବାସୀଙ୍କ ଜୀବନ ଯାଉଛି ବୋଲି ସାଧାରଣରେ ଚର୍ଚ୍ଚା ।
ଅର୍ଗସ ବ୍ୟୁରୋ : ଝାଡ଼ଖଣ୍ଡରେ କମ୍ପୁଛି ପ୍ରଚାର ମଇଦାନ । ଜନତାଙ୍କ ମନ ଜିଣିବାକୁ ଉଭୟ ଏନଡିଏ ଓ ଇଣ୍ଡିମେଣ୍ଟର ତୁଙ୍ଗ ନେତା ଜାରି ରଖିଛନ୍ତି ଘମାଘୋଟ ପ୍ରଚାର । ଝାଡ଼ଖଣ୍ଡରେ ବଢୁଛି ଅନୁପ୍ରବେଶକାରୀ ଉପଦ୍ରବ । ଜେଏମଏମ ଶାସନରେ ଅବହେଳିତ ମୂଳନିବାସୀ ଆଦିବାସୀ ସଂପ୍ରଦାୟ। ରାଜ୍ୟର ରୋଟି, ବେଟି ଓ ମାଟିକୁ ରକ୍ଷା କରିବାକୁ ଚାଇଁବାସା ଜନ ସମ୍ବାଦ କାର୍ଯ୍ୟକ୍ରମରେ ଆହ୍ବାନ ଦେଇଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ପ୍ରାକୃତିକ ସମ୍ପଦରେ ଭରପୁର ଝାଡ଼ଖଣ୍ଡରେ ଆଜି ସୁରକ୍ଷା ସବୁଠାରୁ ବଡ଼ ପ୍ରସଙ୍ଗ । ଆଦିବାସୀଙ୍କୁ ନ୍ୟାୟ ଦେବା ପରିବର୍ତ୍ତେ ସରଳତାର ସୁଯୋଗ ନେଇ ଜେଏମଏମ ସରକାର ଲୁଣ୍ଠନ କରୁଥିବା ଅଭିଯୋଗ କରିଛନ୍ତି ଧର୍ମେନ୍ଦ୍ର । ଚାଇଁବସାର ମୂଳ ଅଧିବାସୀ, ମହିଳା ଓ ଯୁବକଙ୍କ ସମସ୍ୟା ସମାଧାନ କରିବାକୁ ଏନଡିଏ ଏକମାତ୍ର ବିକଳ୍ପ ବୋଲି କହିଛନ୍ତି ଧର୍ମେନ୍ଦ୍ର ।
ଝାଡ଼ଖଣ୍ଡ ନିର୍ବାଚନ ପ୍ରଚାର ମଇଦାନରେ ଓଡ଼ିଆ ନେତାଙ୍କ ରଣ ହୁଙ୍କାର । ଝାଡ଼ଖଣ୍ଡ ନିର୍ବାଚନରେ ଏଥର ନିର୍ଣ୍ଣାୟକ ଭୂମିକାରେ କୋହ୍ଲାନ ପ୍ରଖଣ୍ଡର ୧୪ ଟି ବିଧାନସଭା କ୍ଷେତ୍ରର ଓଡ଼ିଆ ଭୋଟର । ପୂର୍ବ, ପଶ୍ଚିମ ସିଂହଭୂମ ଏବଂ ଷଢେଇକଳା ଖରସୁଆଁ ଜିଲ୍ଲାରେ ଅଛନ୍ତି ୨୦ ଲକ୍ଷରୁ ଅଧିକ ଓଡ଼ିଆ ଭୋଟର । ହେମନ୍ତ ସୋରେନ ସରକାର ଓଡ଼ିଆ ବହୁଳ ଅଞ୍ଚଳର ବିକାଶରେ ହୋଇଛନ୍ତି ବିଫଳ । ଅବହେଳିତ ଓଡ଼ିଆଙ୍କୁ ନ୍ୟାୟ ଦେବା ସହ ଅଞ୍ଚଳର ବିକାଶ ପ୍ରତିଶ୍ରୁତି ଦେଇଛନ୍ତି ବିଜେପିର ଓଡ଼ିଆ ନେତା । ବହଡାଗୋଡା ବିଧାନସଭା କ୍ଷେତ୍ରର ଚାକୁଳିଆରେ ମହିଳା ସମାବେଶରେ ସାମିଲ ହୋଇ ଝାଡ଼ଖଣ୍ଡ ସରକାରଙ୍କ ଆଦିବାସୀ ଓ ମହିଳା ଶୋଷଣ ନୀତିର ପର୍ଦ୍ଦାଫାସ କରିଛନ୍ତି କେନ୍ଦ୍ରମନ୍ତ୍ରୀ ଶିବରାଜ ସିଂହ ଚୌହାନ ।
ଅଧିକ ପଢନ୍ତୁ : କଂଗ୍ରେସର ଆଦିବାସୀ ବିରୋଧୀ ନୀତିକୁ ପ୍ରଧାନମନ୍ତ୍ରୀଙ୍କ କଡ଼ା ସମାଲୋଚନା
ଆସନ୍ତା ୧୩ ତାରିଖରେ ୪୩ଟି ବିଧାନସଭା କ୍ଷେତ୍ରରେ ହେବାକୁ ଯାଉଛି ପ୍ରଥମ ପର୍ଯ୍ୟାୟ ମତଦାନ। ସେଥିମଧ୍ୟରେ ରହିଛି କୋହ୍ଲାନ ପ୍ରଖଣ୍ଡର ୧୪ ଟି ଓଡ଼ିଆ ବହୁଳ ବିଧାନସଭା କ୍ଷେତ୍ର। ବିଜେପି ସଂକଳ୍ପ ପତ୍ରରେ ରାଜ୍ୟବାସୀଙ୍କ ପାଇଁ 25 ବଡ଼ ଘୋଷଣା ପ୍ରତିଦ୍ବନ୍ଦୀ ଇଣ୍ଡିମେଣ୍ଟର ଚିନ୍ତା ବଢ଼ାଇଛି ।
ଅର୍ଗସ ବ୍ୟୁରୋ: ତୃତୀୟ ଦିନ ପାଇଁ ଜାମ୍ମୁ କାଶ୍ମୀର ବିଧାନସଭାରେ ଜାରି ରହିଛି ତୁମୁଳ କାଣ୍ଡ। ଧାରା ୩୭୦କୁ ଫେରାଇବା ନେଇ ବିଧାନସଭାରେ ଶାସକ ମେଣ୍ଟର ପ୍ରସ୍ତାବ ପରଠୁ ଉଠୁଛି ପଡୁଛି ଜାମ୍ମୁ କାଶ୍ମୀର ବିଧାନସଭା। ବିଜେପି ସଦସ୍ୟ ଏଭଳି ପ୍ରସ୍ତାବକୁ କରୁଛନ୍ତି ଜୋରଦାର ବିରୋଧ। ଶୁକ୍ରବାର ଗୃହ କାର୍ଯ୍ୟ ଆରମ୍ଭ ହେବାମାତ୍ରେ ବିଜେପି ସଦସ୍ୟ ମାନେ ପ୍ରଥମେ ବ୍ୟାନର ଦେଖାଇ ନାରାବାଜି ସହ ଶାସକ ଦଳର ପ୍ରସ୍ତାବର କରିଥିଲେ ବିରୋଧ। ନ୍ୟାସନାଲ କଂଗ୍ରେସ ଓ ପିଡିପି ସଦସ୍ୟ ବି ଦେଇଥିଲେ କାଉଣ୍ଟର ସ୍ଲୋଗାନ୍। ଧୀରେ ଧୀରେ ପରିସ୍ଥିତି ଅସମ୍ଭାଳ ହୋଇଥିଲା । କଥା ହାତାହାତି ଯାଏ ଯାଇଥିଲା। ବାଚସ୍ପତିଙ୍କ ନିର୍ଦ୍ଦେଶରେ ୧୨ ବିଜେପି ସଦସ୍ୟଙ୍କୁ ଜବରଦସ୍ତି ମାର୍ଶାଲମାନେ ଗୃହରୁ ବାହରକୁ ନେଇଯାଇଥିଲେ। ଏହାପରେ ବିଜେପି ସଦସ୍ୟମାନେ ବିଧାନସଭା ବାହାରେ ଧାରଣାରେ ବସି ବାଚସ୍ପତିଙ୍କ ନିଷ୍ପତ୍ତିର ବିରୋଧ କରିଥିଲେ।
ଜାମ୍ମୁ କାଶ୍ମୀରରେ ଧାରା ୩୭୦ ଫେରାଇବାକୁ ଏନସି କଂଗ୍ରେସ ମେଣ୍ଟର ଉଦ୍ୟମ ମହାରାଷ୍ଟ୍ର ନିର୍ବାଚନକୁ କରିିଛି ସରଗରମ। ବିରୋଧୀଙ୍କୁ ଘେରିବାକୁ ବିଜେପିକୁ ମିଳିଯାଇଛି ବଡ଼ ପ୍ରସଙ୍ଗ। ବ୍ୟାକଫୁଟରେ କଂଗ୍ରେସ ସମେତ ପୂରା ମହାଅଘାଡ଼ି। ମହାରାଷ୍ଟ୍ରରେ ନିଜର ପ୍ରଥମ ନିର୍ବାଚନ ପ୍ରଚାରରେ ଭାଗନେଇ ଉଭୟ ପ୍ରଧାନମନ୍ତ୍ରୀ ମୋଦି ଓ ଗୃହମନ୍ତ୍ରୀ ଅମିତ ଶାହ କଂଗ୍ରେସକୁ କରିଛନ୍ତି ଜୋରଦାର ପ୍ରହାର। ମୋଦି କହିଛନ୍ତି ଭାରତରେ ପାକିସ୍ତାନର ଏଜେଣ୍ଡା ଲାଗୁହେବାକୁ ଦିଆଯିବନି। ତ ଶରଦ ପାୱାରଙ୍କ ଉଦ୍ଦେଶ୍ୟରେ ଶାହାଙ୍କ ହୁଙ୍କାର ଆପଣଙ୍କ ୪ ପୀଢ଼ି ଆସିଲେବି ଆଉ ଜାମ୍ମୁ କାଶ୍ମୀରରେ ଫେରାଇପାରିବେନି ଧାରା ୩୭୦।
ଠିକ୍ ମହାରାଷ୍ଟ୍ର ଓ ଝାଡ଼ଖଣ୍ଡ ବିଧାନସଭା ନିର୍ବାଚନ ବେଳେ ଜାମ୍ମୁ କାଶ୍ମୀର ବିଧାନସଭାରେ ଧାରା ୩୭୦ ଫେରାଇବାକୁ ଶାସକ ଦଳର ପ୍ରସ୍ତାବ କଂଗ୍ରେସ ଗଳାରେ ସାଜିଛି କଣ୍ଟା। ସେଠାରେ ଏହି ପ୍ରସ୍ତାବକୁ ଯଦିଏ କଂଗ୍ରେସ ଚୁପଚାପ ସମର୍ଥନ କରୁଛି। କିନ୍ତୁ ଜାମ୍ମୁ କାଶ୍ମୀର ବାହାରେ ଧାରା ୩୭୦ ଫେରାଇଆଣିବା କଥା କହିବାକୁ କଂଗ୍ରେସର ନାହିଁ ଦମ୍। କଂଗ୍ରେସର ଏହି ଦୋହରା ଚରିତ୍ର ଏବେ ବିଜେପିକୁ ଧରାଇଦେଇଛି ବଡ଼ ପ୍ରସଙ୍ଗ। ଆଗକୁ ଏହି ପ୍ରସଙ୍ଗ ଅଧିକ ଉଗ୍ର ରୂପ ନେବା ସହ କଂଗ୍ରେସ ଓ ମହାଅଘାଡ଼ି ପାଇଁ ବନିପାରେ ସବୁଠୁ ବଡ଼ ଅଡୁଆ ।
ଅଧିକ ପଢ଼ନ୍ତୁ ଓଡିଶା ଖବର...
