୨୦୧୪ ରେ ଲୋକସଭାରେ ବିଜେଡିର ସଂଖ୍ୟା ଥିଲା ୨୦ ଯାହାକି ୨୦୧୯ ରେ ଖସି ୧୨ ରେ ପହଁଚିଥିଲା । କିନ୍ତୁ ୨୦୨୪ ନିର୍ବାଚନରେ ଚିତପଟାଙ୍ଗ ମାରିଲା ଦଳ । ଲୋକସଭାରୁ ମୂଳପୋଛ ହେଇଗଲା ବିଜେଡି । ଆଉ ଏବେ ନିର୍ବାଚନର ୪ ମାସ ମଧ୍ୟରେ ଦୁଇ ରାଜ୍ୟସଭା ଆସନ ବି ଦଳ ହାତରୁ ଖସିଗଲାଣି । ଫଳରେ ରାଜ୍ୟସଭାରେ ବିଜେଡି ୯ ରୁ ୭ ଖସି ଆସିଛି । ଚର୍ଚ୍ଚା ହେଉଛି ଆଗକୁ ଆହୁରି ରାଜ୍ୟସଭା ସାଂସଦ ମଧ୍ୟ ବିଜେଡି ଶିବିର ଛାଡି ପାରନ୍ତି । ଯଦି ଏହି ଧାରା ଜାରି ରହେ ତାହାଲେ ସ୍ଥିତି ପୁରା ବିଗିଡିଯିବ ।
ନିର୍ବାଚନ ହାରିବା ପରେ ଦଳର ଏଭଳି ସ୍ଥିତି ମୁଖିଆଙ୍କ ଚିନ୍ତା ବଢ଼ାଇଛି । ନେତୃତ୍ୱ ପ୍ରତି ନେତାଙ୍କ ତୁଟୁଥିବା ଆସ୍ଥା ଏବଂ ପରାଜୟ ପରେ ଭାଙ୍ଗିପଡ଼ିଥିବା କର୍ମୀଙ୍କ ମନୋବଳ ବଢାଇବା ଲାଗି ଗ୍ରାଉଣ୍ଡକୁ ଓହ୍ଲାଇଛନ୍ତି ଖୋଦ ବିଜେଡି ସୁପ୍ରିମୋ ନବୀନ ପଟ୍ଟନାୟକ । ୨୪ ବର୍ଷ ପରେ ପ୍ରଥମ ଥର ପାଇଁ ରାଜଧାନୀର ବିଭିନ୍ନ ଗଣେଶ ପୂଜା ମଣ୍ଡପ ବୁଲିବା ସହ ଲୋକଙ୍କ ଗହଣକୁ ଓହ୍ଲାଇଛନ୍ତି । କେବଳ ସେତିକି ନୁହେଁ ନଭେମ୍ବରରୁ ନିଜେ ନବୀନ ଜିଲ୍ଲା ବୁଲିବେ ବୋଲି ପୂର୍ବରୁ ଘୋଷଣା କରିଛନ୍ତି । ସେପଟେ ବିଜେପି ଏନେଇ ପ୍ରତିକ୍ରିୟା ରଖିଛି । କହିଛି, ୨୪ ବର୍ଷ ହେବ ଲୋକେ ମୁଖ୍ୟମନ୍ତ୍ରୀ କରିଥିଲେ ବି ଦିନେ ବି ସାଧାରଣ ଲୋକଙ୍କ ଦୁଃଖ ଶୁଣିବା ପାଇଁ ସମୟ ନଥିଲା । ସବୁବେଳେ ନବୀନ ନିବାସ ଭିତରେ ଜଣେ ପ୍ରଭାବଶାଳୀ ଲୋକଙ୍କ ଆଢୁଆଳରେ ରହୁଥିବା ନବୀନ ମେଳାପୀ ମୁଖ୍ୟମନ୍ତ୍ରୀ ମୋହନ ମାଝୀଙ୍କୁ ଦେଖି ବାହାରକୁ ବାହାରିବାକୁ ବାଧ୍ୟ ହୋଇଛନ୍ତି । ଯାହାର ଜବାବ ରଖିଛି ବିଜେଡି ।
କଥା ହେଲା ୨୪ ବର୍ଷ ଶାସନ କରିବା ପରେ ବି ଦଳର ନେତୃତ୍ଵ ଉପରେ ନେତା ଓ କର୍ମୀଙ୍କ ସତେ ଯେମିତି ଭରସା କି ବିଶ୍ଵାସ ନାହିଁ । ବୋଧହୁଏ ସେଇଥି ଲାଗି ନିଇତି ନେତା ଛାଡୁଛନ୍ତି ଦଳ । ଏଇ ଯେମିତି ଶନିବାର ରାୟଗଡା ଜିଲ୍ଲାର ପୁର୍ବତନ ବିଜେଡି ବିଧାୟକ ବିଭିଷଣ ମାଝୀ ଦଳ ଛାଡି ବିଜେପିରେ ସାମିଲ ହୋଇଛନ୍ତି । ସେହିପରି ନବରଙ୍ଗପୁର ଜିଲ୍ଲା ବିଜେଡି ଉପ-ସଭାପତି ରଜନୀକାନ୍ତ ପଟ୍ଟନାୟକ ମଧ୍ୟ ବିଜେଡି ଶିବିରକୁ କରିଛନ୍ତି ବାଏ ବାଏ । ସବୁଠୁ ସାଂଘାତିକ ସ୍ଥିତି ସୃଷ୍ଟି ହୋଇଛି ନବୀନଙ୍କ ନିଜ ଗଡ଼ ହିଂଜିଳିରେ । ଗୁରୁତ୍ଵପୂର୍ଣ୍ଣ କଥା ହେଲା, ୨୪ ବର୍ଷ ହେବ ନବୀନ ନିଜ ନିବାସ ଛାଡି ବେଶୀ କୁଆଡେ ବାହାରକୁ ବାହାରନ୍ତି ନାହିଁ କି ତାଙ୍କୁ ଦେଖା କରିବା ସାଧାରଣ ଲୋକଙ୍କ ପାଇଁ ଏତେ ସହଜ ନଥିଲା । ଏପରିକି ନିଜ ଦଳର କର୍ମୀ ଓ ନେତାଙ୍କୁ ମଧ୍ୟ ନବୀନଙ୍କୁ ଭେଟିବା ଲାଗି ଜଣେ ପ୍ରଭାବଶାଳୀ ଲୋକଙ୍କ ଅନୁମତି ନେବାକୁ ପଡୁଥିଲା । ନବୀନଙ୍କ ବଦଳରେ ପ୍ରଥମେ ବବି ଓ ପରେ ପାଣ୍ଡିଆନ ବୁଲି ବୁଲି ରାଜ୍ୟସାରା ବିଜେଡି ସଂଗଠନ କାମ କରୁଥିଲେ । ସ୍ଥାନୀୟ ନେତାଙ୍କୁ ଅଣଦେଖା କରି ପ୍ରତି ନିର୍ବାଚନ ମଣ୍ଡଳୀରେ ସୃଷ୍ଟି କରିଥିଲେ ପ୍ରତିଦ୍ବନ୍ଦିତା ମୂଳକ ପରିସ୍ଥିତି । ଯାହାର ସ୍ଥିତି ୨୪ ନିର୍ବାଚନରେ ଭୋଗିଲା ଦଳ । ଏବେ ସମୟ କହିବ କେମିତି ମଙ୍ଗକୁ ସଳଖ କରୁଛନ୍ତି ନବୀନ ।
